السلام عليكم أصدقائي الأعزاء
هاو أر يو .... أي ميس يو تووووووووو مطش
بقالي كتير مكتبتلكمش حاجة
وده مش عبط مني ولا حاجة لا سمح الله
انا كنت بكتب برضه والحمد لله بس محدش عارف الخير فين بقى ولا حد عارف الورق اللي كتبت فيه راح فين
الله يرحمه ويباركلي في اولاد اخواتي يارب ... الكلام واضح طبعا
المهم بقى سريعا كده قبل مانسى
أحب أقولكم اني لسه زي مانا
بكل أسف
لسه سعييييييييييييييييد
وبالعكس
يمكن سعيد أكتر وأكتر
حقيقى مش عارف أقول أيه ولا أعمل أيه
مافيش حاجة أقدر أقولها غير محدش عارف الخير فين
المهم اني النهارده كنت بتمشى مع صديقي الانتيخ شلوفة
وده طبعا أعز أصدقائي لأنه معايا من كتييييييييييييييييييييير كده
المهم اننا واحنا ماشيين النهارده عدينا أعزكم الله على مدرسة
مجرد مدرسة
للأسف برضه
كانت مدرستنا أيام السنوي
وقفنا قدامها شوية كده و مش عارف أيه اللي شدني للمدرسة النهارده بالذات
على فكرة كانوا مبيضين وجهة المدرسة يمكن ده اللي شد انتباهي ليها
بس اللي انا متأكد منه انهم بيضوا الوجهة بس بتاعت المدرسة
أكيد من جوا لسة زبالة زي ما كانت
أجمل ما في الموضوع اننا واحنا واقفين افتكرنا زماااااااااااااااان من حوالي خمس سنين أو ست سنين
لما كنا في تانية ثانوي
وأفتكرت فصلنا
2/9
الفصل الوحيد اللي فاكر أسمة ورقمه ومكانه كمان
ولسه فاكر الدكة اللي كنت بقعد عليها انا وشلوفة صاحبي
كنت بقعد في الدكة اللي قبل الاخيرة في صف الدكك الللي على اليمين
وافتكرنا اصحابنا
ابو فيري وطه ومحمد عدلي
أفتكرنا الكابتن رضا شحاتة بتاع العسكرية
على فكرة ده مش أسمه .. هوا كان شبه لعيب كورة اسمه رضا شحاتة
فسميناه على اسمه
أفتكرنا ناظر المدرسة والقرار 190 الذي ينص على انه اذا غاب أي طالب أكتر من 25 % من الايام الدراسية يحرم من دخول الامتحانات
ده طبعا كان كل يوم في الطابور
افتكرنا دوري الفصول لما كنت انا قلب الدفاع بتاع الفريق بتاعنا
وكان شلوفة صاحبي المشجع الوحيد اللي بيشجع فريقنا
وباقي المدرسة كلها بتشجه 2/10 اللي كنا بنلاعبهم
بس مع ذلك فزنا عليهم 3-0 وكنا هانصعد بس للأسف المطش أتعاد في يوم تاني
وكسبونا 3-0 برضه وصعدوا هما بس على فكرة انا مكنتش موجود في المطش ده كنت غايب
أكيد أتغلبوا عشان انا مكنتش معاهم
محدش عارف الخير فين
أفتكرنا حاجات كتييييييييييييييييييييييييييييير
بصراحة يا جماعة كانت أفضل وأسعد أيام حياتي هي أيام
2/9
أكيد أتخنقتوا مني ودوشت دماغكم عالفاضي
بس بجد يا خواننا الزكريات دي حاجة جميلة جدا وحلوة جدا وكل حاجة جدا جدا
وأكيد كل واحد منكم عنده برضه زكريات زيي كده
ياريت تحاولوا تقعدوا مع بعض كده تفتكروا زكرياتكم
صدقوني مش هاتندموا
وسمعني أغنية زكريات لعمرو دياب
كان معكم الصديق المخلص
حمادة زكريات
