World Time (عزبة الجربوعة)

Monday, January 19, 2009

عرب الرمال


ضحكوا علينا وقالوا دي بلدنا ارض الرجال
تقدر تعدي بحور وتقدر تهد جبال
بصيت عالناس لقيت حال غير الحال
حال لا يفك حصار ولا يريح بال
ولقيت كمان الارض تايهة في كل مجال
تبكى تقول انا مين انا لسه عندي سؤال
ده ذل ولا مهانة ولا ده لعب عيال
دانا ارض عربية وقلبي كله جمال
ومن زمان وانا ارض واحدة فيها كل الرجال
دلوقتي حالي يبّكي وبقيت على دا الحال
أصرخ في وجه الكل واقول ااااااااااااه يا عرب الرمال
دا كل واحد فيكم راضي على دا الحال
مادام ارضه بخير ومدام عنده رمال
ورماله دي ماهي مني وبرضه حتة أرض
وانا ارض واحدة يا ناس والارض زي العرض
ومدام الارض راحت يبقى جهادك فرض
وتقول لمين مخلاص راحت علينا يا خال
***
تحت الحصار في ظلام أخويا قاعد هناك
قاعد في وسط النار وفي كل حته هلاك
سامع بوداني صوته بيقول كفاية ضلال
وصوت قنابل رصاص بيضرب في كل مجال
ناداني تاني الحق عدو ظالم غاشم افاك
دا غريبها حن عليا وانت ولا انت هناك
دا حرام علينا نعيش في كل دا اذلال
ماتحط ايدك في ايدي ننول كل المنال
ونطوف في شرق وغرب ونروح جنوب وشمال
سيبته واديته ضهري في ذل واضمحلال
قالي كفاية حرام دانا حتى عندي عيال
مازن وزيد وحبيبة ونور وفاطمة وبلال
لو ضاعوا اعيش لمين وهايبقى ايه الحال
وفي وسط زحمة صوت تايه في كل زمان
سكت صوته ومفيش غير دمه في كل مكان
وناديت عليه وجريت قال يعني عندي حنان
وصحيت فجأة وجريت اصرخ في كل مكان
اااااااااااااااااه يا خويا .... فين ايام زماان
راحت كل الحاجات ومعادتش تاني امان
دانا قتلتك بأيدي من يوم الاحتلال
يوم ما ديرت ضهري ويوم ماسبت العيال
وسبتك لوحدك اعزل في قبضة المحتال
وأديني دلوقتي وحدي ومعادش عندي امان
وااه يابلادي منك وااااااااه يا عرب الرمال
دي رمال ساكنة وخلاص مبقتش فيها حياة
ودا امر واقع كان ومعادش منه نجاة
ويا خوفي يا ولادي بعدي لما تقولوا الاه
محدش يرد عليكم ويبقى حالكم حال
رُد عليا يا اخويا .. رُد يا حبيب زمان
رد عليا وقال أنا هنا في كل زمان
انا هاموت هنا على ارضي وانا راضي وكلي ايمان
وهاصحى على صوت ضميرك لو صحّت الاحوال
وهاصحى على صوت ضميرك لو صحّت الاحوال

2 comments:

shimaa said...

ضحكوا علينا وقالوا دي بلدنا ارض الرجال
فعلا بلدنا أرض الرجال ومصنعهم
مع انى أختلف معاك فى ضحكوا علينا
جايز يكون دلوقتى أو فى زمنا دة مش لاقى أخلاق الرجال الصح واللى ينفع بيها أقود الامة بس لسة فينا بأمر الله خير جنود الارض والدليل حديث الرسول صلى الله علية وسلم
إن الله سيفتح عليكم مصر فاتخذوا من أهلها جنداً كثيفاً فإن أجنادها خير أجناد الأرض وهم فى رباط هم وأزواجهم إلى يوم القيامة
صدق رسول الله صلى الله علية وسلم
وده خير دليل يفتخر بيه كل مصرى بفضل الله


أصرخ في وجه الكل واقول

ااااااااااااه يا عرب الرمال
ودى حتة وجعتنى أوى أه ياعرب الرمال
هما فين دلوقتى عرب الرمال ..متفرقين جايز .. بس فى برضة ولو بصيص أمل أن أحداث غزة الاخيرة جمعتهم كلهم على قلب رجل واحد بالدعاء والتبرع والاغاثه على قدر الامكان ولكننا مقصريين حتى يتم تحرير كل بلد عربية
بين قوسين
المعنى حلو أوى والحس فيةأجمل ودة غطى على الكلمات البسيطة اللى مدية معنى حلو

Hamada Object said...

شكرا يا استاذة شيماء على التحليل الرائع للقصيدة ده .. وأتمني بجد تكون حظيت باعجابك بس انا لما كتبت ضحكوا علينا وقالوا دي بلدنا ارض الرجال .. كنت حاسس بجد اننا بينضحك علينا
وانا مش متعارض طبعا مع الكلام اللي حضرتك قولتيه بس انا بتكلم على الوضع الراهن دلوقتي واللي احنا عايشينه