بلدنا رايح جاي

السلام عليكم .. كيف حالكم .... واحشنني والله عاملين ايه ... الله يمسيكم بالخير بقى ..., مع السلامة

هااااااااي ... هاو أر يو مان .... يو أر ويلكوم ... سي يوووووووو . غور كتك داهية

والله الواحد ماعارف يقول ايه ... طب أكتب أيه بس يا خواننا ... بتجيلي حالة كده غريبة جدا

الحالة الغريبة دي بتفقد البني ادم القدرة على الانتاج نهائيا

زي ما تقولوا كده بعيد عنكم الأبلاتين والكوندنسر عايزين يتغيروا

الحالة دي جتلي (بعيد عنكم) مرة وكنت واقف في الرجيستريشن بتاع تدريب بملا استمارة الاشتراك في التدريب انا وواحد صاحبي والاستمارة مافيهاش أسئلة غريبة نهائيا يعني مثلا مكانش فيها سؤال بيقول مين أول واحد عدى البحر وماتبلش او مين اللي وقع من الدور التلاتاشر ومماتش ولا حاجة من دي

الأسئلة كلها كانت الاسم والتليفون والايميل وهكذا وهلم جرا

واذا بالابلتين يقطع كهربا وانا لسه بحط القلم عشان أكتب أسمي

مسكت القلم مش عارف اكتب ولا كلمة والناس ابتدت تبصلي ولسان حالهم بيقول (شايف العبيط اللي مش عارف يكتب أسمه هناك ده ... كتها نيلة اللي عايزة خلف من العينة دي) محدش عارف الخير فين

وعشان الموقف بقى محرج للغاية روحت ضارب بعيني في ورقة صاحبي ودون تفكير روحت راشق اسمه قدام خانة الاسم

والحمد لله اني فوقت قبل ما أنقل التليفون والايميل كمان والا كانت هاتبقى فضيحة بجلاجل

عالعموم محدش عارف الخير فين

بس ياريت يا خواننا لو حد يعرف يجبلي ابلاتين وكوندنسر استعمال نضيف ويكونوا حنينيين في السعر ده يبقى عمل فيا جميل كبير قوي

كان معكم عضو رابطة الزهيمر المصرية من داخل فوهة البركة السودا اللي في اخر الطريق يمين

حمادة أوبجكت

سي يوووووووو...... فيري جودباي

ولا عزاء للسيدات ولا الرجال حتى