عجبا الى الدنيا

عجبا الى الدنيا ... ان أقبلت باض الحمام على الوتد
وإن أدبرت ... بال الحمار على الأسد

الله عليك يابا
أمي قالتلي ان أبويا " الله يرحمه" كان دايما يقول المثل ده
فعلا ابويا ده كان راجل شديييييييد
اليومين دول بس ابتديت أحس قوي بالجملة دي
وده لأني كالعادة وبكل سعادة
مش عارف اي حاجة في اي حاجة ... وده طبعا الاحساس المفضل بالنسبالي
زي احد الحيوانات كده أعزكم الله
بس خلاص الكلام ده انا قولته قبل كده كتيييييييير
بس بجد اليومين دول
حاسس انها أقبلت وأدبرت في نفس الوقت
على احد الصعايدة (اللي هي جمع صعيد) انا شايف الدنيا حلووووووة جدا وبمبي وكل حاجة بتقول اني خلاص نويت ولأول مرة في حياتي اني ابقى اسعد انسان على وجه البسيطة (اللي هي الأرض يعني) ... وبرضه على صعيد أخر أجد نفسي في مشقات ومتاعب لا حصر لها ولا نهاية واكاد أتمنى لو ان البسيطة (اللي هي نفس الأرض) ان تنشق وتبلعني من كثر ما أحمل على عاتقي من هموم
يلا ... الله يرحمك يابا
بس اللي خلف ماماتش ... ماتقلقش ياحج قطب

محدش عارف الخير فييييييين

عرب الرمال

ضحكوا علينا وقالوا دي بلدنا ارض الرجال
تقدر تعدي بحور وتقدر تهد جبال
بصيت عالناس لقيت حال غير الحال
حال لا يفك حصار ولا يريح بال
ولقيت كمان الارض تايهة في كل مجال
تبكى تقول انا مين انا لسه عندي سؤال
ده ذل ولا مهانة ولا ده لعب عيال
دانا ارض عربية وقلبي كله جمال
ومن زمان وانا ارض واحدة فيها كل الرجال
دلوقتي حالي يبّكي وبقيت على دا الحال
أصرخ في وجه الكل واقول ااااااااااااه يا عرب الرمال
دا كل واحد فيكم راضي على دا الحال
مادام ارضه بخير ومدام عنده رمال
ورماله دي ماهي مني وبرضه حتة أرض
وانا ارض واحدة يا ناس والارض زي العرض
ومدام الارض راحت يبقى جهادك فرض
وتقول لمين مخلاص راحت علينا يا خال
***
تحت الحصار في ظلام أخويا قاعد هناك
قاعد في وسط النار وفي كل حته هلاك
سامع بوداني صوته بيقول كفاية ضلال
وصوت قنابل رصاص بيضرب في كل مجال
ناداني تاني الحق عدو ظالم غاشم افاك
دا غريبها حن عليا وانت ولا انت هناك
دا حرام علينا نعيش في كل دا اذلال
ماتحط ايدك في ايدي ننول كل المنال
ونطوف في شرق وغرب ونروح جنوب وشمال
سيبته واديته ضهري في ذل واضمحلال
قالي كفاية حرام دانا حتى عندي عيال
مازن وزيد وحبيبة ونور وفاطمة وبلال
لو ضاعوا اعيش لمين وهايبقى ايه الحال
وفي وسط زحمة صوت تايه في كل زمان
سكت صوته ومفيش غير دمه في كل مكان
وناديت عليه وجريت قال يعني عندي حنان
وصحيت فجأة وجريت اصرخ في كل مكان
اااااااااااااااااه يا خويا .... فين ايام زماان
راحت كل الحاجات ومعادتش تاني امان
دانا قتلتك بأيدي من يوم الاحتلال
يوم ما ديرت ضهري ويوم ماسبت العيال
وسبتك لوحدك اعزل في قبضة المحتال
وأديني دلوقتي وحدي ومعادش عندي امان
وااه يابلادي منك وااااااااه يا عرب الرمال
دي رمال ساكنة وخلاص مبقتش فيها حياة
ودا امر واقع كان ومعادش منه نجاة
ويا خوفي يا ولادي بعدي لما تقولوا الاه
محدش يرد عليكم ويبقى حالكم حال
رُد عليا يا اخويا .. رُد يا حبيب زمان
رد عليا وقال أنا هنا في كل زمان
انا هاموت هنا على ارضي وانا راضي وكلي ايمان
وهاصحى على صوت ضميرك لو صحّت الاحوال
وهاصحى على صوت ضميرك لو صحّت الاحوال

بحب التلفزيون

يا سلااااام........ ليلة جميلة جدا .. ثوانى بس أعمل الشاى وكام ورقة فاضية كده وقلم وكل شىء هيبقى تمام ...... أنا رايق ومتكيف وحالتى تمام خاااااص .......شكلها كده شعر ...أه أنا هاكتب شهر النهاردة .. بيت .. بيتين .. تلات أبيات .... شكلها هاتفتح وهانبنى قرية سياحية فاخرة.... سبحان الله ... أيه الروقان اللى أنا فيه ده .... كل الظروف متوفره معادا حاجة واحدة بس , أمى مشغلة التلفزيون وصوته عالى جداً ,أنا هطلع أقولها توطى الصوت شوية .... أصل عندها حاجة كده شبه البطيخة إسمها (دش) ولها ريموت كونترول تقدر تعمل كل اللى أنت عايزه وأنت نايم على الكنبة اللى فى أخر الصالة .

لكن يا محاسن الصدف مطش الأهلى وأنمبى كان بيتعاد وأنا طالع فقلت أقعد أتفرج ولكن أمى لأنها مش بتحب الكورة أخذت الريموت غيرت المحطة . وهنا بدأت المأساة أصدقائى الأعزاء ... كان فى المحطة الأخرى برنامج تلفزيونى من بتاع اليومين دول بيتكلم عن سرقة أراضى الدولة ونهب ثروات البلد. خمس دقائق من الضغط العصبى والنفسى حتى شعرت بأنى غير قادر على الحركة حتى أنهت أمى تلك الحالة بقولها أيه حرقه الدم ديه ثم غيرت المحطة لتنتقل إلى برنامج أخر به مزيعة وشخصان أحدهما مشوه الوجه والأخر مشوه الجسم وتقول سوف نتكلم اليوم عن العنف بين الأطفال والمدرسين فى المدارس وأخذ الشخص مشوه الوجه يحكى حكايته مع أحد زملاءه اللى أجرله بلطجية أستنوه بره المدرسة وسلموا عليه . ثم أنتقلت إلى الأخر الذى ضربه مدرسه لأنه رفض أن يمسح له الشقة . فى النهايه قالت أمى حسبنا الله ونعم الوكيل ثم غيرت المحطة حين ظهر مزيع يتكلم عن أزمة إقتصادية عالمية سوف تودى بالسيولة العالمية وشويه كلام فى السياسة كده مش فاهمه بس بيدل على أننا داخليين على أيام سوده . حينها طلبت من أمى الريموت ثم غيرت القناه فظهرت الراقصة العظيمه (آسف جدا) المغنية المحترمة جدا التى تحث الناس على التوفير فى قماش الملابس لمواجهه الأزمة الأقتصادية وهى ترقص وتغنى وتنشد فى كل سعادة وإنبساط ولك لأنها أكيد مش عندها البطيخة اللى عندنا فى البيت اللى أسمها الدش حين ذلك أضطرت أمى لغلق التلفزيون حين دخلت أنا حجرتى لأكتب الشعر ولكن أى شعر .... لم يعد بالرأس شيئاٌ كى أكتبه .......راح الكلام وراحت الحالة الجيدة اللى كنت فيها (راااااااااااح خد أملى وراح ..راااااااااااح ) على رأى العندليب ,ومش لاقى أصدقائى غير بيتين شعر كنت ألفتهم زمان وده بس عشان قلت أني هاكتب شعر .

أرحل بعيداٌ عن هذة الدنيا ...................فلم يبقى شيئاٌ بأيدينا
من كان فيها مؤمنا فقد ملكها ......ومن ملكته فياله من مسكينا

كان معكم من أمام الورقة حائرا
حمادة أوبجكت

copywrite

اصدقائي الأعزاء السلام عليكم ورحمة الله وبركاته
أزيكم عامملين ايه ... فينكم يا جماعة مش بتيجوا ليييييه
رمضان كريم وكل سنة وانتم طيبين ويا رب ينتهي الشهر ده واحنا كده ذنوبنا كلهل مغفورة ومعتقين من النار
مش عارف من حقي اسأل ولا لا عاملين ايه ياجماعة في رمضان ايه اخبار الطاعات هل فعلا بنستغل الفرصة دي صح ولا هنضيعها زي كتييييييير من الفرص اللي بتضيع
عالعموم ربنا يباركلنا في الفرصة دي وان شاء الله ماتضيعش من ايدينا وخلوني اخش في الموضوع اللي ليه علاقة بالفرصة دي الا وهوا حقوق الملكية الفكرية
وده عبارة عن قانون سمعت عنه (وانا اجهل الجاهلين بيه على فكرة) وشغلته انه بيحافظ على الافكار لأصحابها بمعنى ان مثلا انا لو (لاقدر الله يعني ) ابتكرت فكرة جديدة في حاجة معينة ماينفعش اي حد يجي ياخد فكرتي كده عالجاهز ..... لازم يدفع الاول وتبقى سيادتك نايم في بيتكم وعمال رصيدك في البنك يزيد لأنك ابتكرت فكرة جديدة وفيه حد تاني بيستخدمها وبيكسب وانت عمال تاخد نسبة من مكسبه لأنك صاحب الفكرة
ده ايه علاقتة بينا دلوقتي ... صبرك بس عليا وانا هقولك ... انا بقى اكتشفت حاجة جميلة جدا وحلوة جدا جدا وكل حاجة جدا جدا وهي ان عندنا في ديننا الاسلامي الجميل ده ربنا عمللنا قانون برضه شبه قانون الملكية الفكرية وده باين جدا في حديث النبي "من سن سنة حسنة فله أجره وأجر من عمل بها الى يوم القيامة " وبرضه "الدال على خير مثا فاعله في الاجر" اذن سعادتك دلوقتي مش هاتعمل حاجة غير انك تفكر في فكرة جديدة تخلي الناس تكسب ثواب وتنشرها للناس تقوم الناس تعمل بيها وتاخد ثواب تقوم انت كمان تاخد ثواب .... قد ايه يارب انت كريم وعظيم
بقى بذمتكم فيه كده .... لا وأيه شوفت النبي وهو بيقول "الى يوم القيامة" يعني سيادتك هتفضل تاخد الثواب حتى بعد ماتموت ....... سبحان الكريم
دي دعوة مني لكل الناس فكروا وانشروا افكاركم وانشروا الفكرة دي ذات نفسها هتاخدوا ثواب عظيييييييم جدا
وعشان اسبقكوا واكون اول واحد يعمل كده عندي ليكم فكرة بسيطة جدا جدا بس عظيمة جدا جدا
النبي صلي الله عليه وسلم بيقول من فطر صائما كان له مثل اجره دون ان ينق من اجر الصائم شيئا
كل اللي المطلوب من حضرتك هوا

ا - نص كيلوا تمر ويا سلام بقى لو من اللي انت بتاكله
ب - اربع خمس زجاجات من الماء من الحنفية

وتنزل على اقرب شارع ساعة اذان المغرب تدي لكل واحد تمرتين تلاتة وتشربه ماية
وتعالى نحسب .... عن تجربة الكمية اللي ذكرتها دي ممكن تفطر من 15 ل20 فرد يبقى سيادتك أخدت قد ايه ؟؟؟؟؟؟؟؟؟؟؟؟ ولو نشرت الفكرة دي وواحد عملها يبقى هتاخد قد ايه ؟؟؟؟؟؟ وانا بقى هاخد قد ايه ؟؟؟؟؟؟؟؟؟ واعي للمصلحة
انا بدعي ربنا ان نكون استفدنا من الفكرة دي وربنا يكرمنا بيها ويعزنا ان شاء الله

في انتظار النتيجة

مطلعتش النتيجة وادينا قاعدين
مش عارفين هاتطلع امتى وفين
يارب استرها معانا داحنا غلبانين
ومش فاهمين وتعبانين
ومحدش عارف الخير فين

***

مش عارفين احنا رايحين فين
وهنعيد السنة تاني ولا معديين
وهنعدي صافي ولا شايلين
وياترى مادة واحدة ولا مادتين

***

يارب استرها معانا داحنا تعبانبن
وامتحانات السنة دي كانت جامدة حبتين
وساعات كنا بنروح مش مخلصين
وعشان مش فاهمين كنا بنطلع ملخبطين
واللي يسألنا نقوله احنا شايلين شايلين

***

يارب استرها معانا دا كلها يومين
وتطلع النتيجة ونبقى تايهين
مش عارفين نرّوح ولا نروح فين
وهانرّوح مبسوطين ولا مهمومين
وساعتها الفضيحة هاتبقى فضيحتين
يارب استرها معانا داحنا غلبانين
يارب استرها معانا داحنا تعبانين

أهداء الى كل من ينتظر النتيجة وخصوصا اصدقائي المهندسين المعذبون في الارض

حمادة أوبجكت