المجلة

مجلتي ...أخيرا علقت مجلتي (مش انا اللي علقتها ده صاحبي فتوح اللي علقهالي) ... بس المهم انها اتعلقت

وعشان تعلق مجلة يا صديقي العزيز ... لازملك خمستلاف وربعميت حاجة كده لازم تكون موجودة

أولا : لازم تفكر مرة وأتنين وتلاتة وخمسين قبل ما تقدم على هذة الفعلة الشنعاء (انا عن نفسي حرمت) ح

ثانيا : لازم تكون ممن يتمتع بالصبر وطول البال والبرود الشديد وعدم الثورة على أي شيء ممكن يحدث لأنك هتقابل مواقف لو انت مش بارد كده وهادي ممكن تنفجر منك لوحدك كده من غير ماحد يكلمك

الموضوع ياخواننا ان المجلة دي استغرقت فترة 3 اسابيع عشان تتمضي بس وفي الاخر ادوهالي أعلقها اسبوع واحد قبل ما تتشال عشان توضيبات الامتحانات وعالعموم بعد المعاناة وجمع التبرعات (قصدي التوقيعات) جت المفاجأة الا وهي ان فيه موضوع من المواضيع اللي انا كاتبها غير مطابق للمواصفات وده طبعا لأنه على حد قول الراجل اللي أعترض "شارب حبتين" (على فكرة توشيبا أحسن منه) ... فعلا ان "شارب" البلية ما يضحك

المهم المجلة نزلت والحمد لله وحسبنا الله ونعم الوكيل بعد ما شيلنا الموضوع الشارب المغضوب عليه وجبنا موضوع تاني على مقاس السيد المسئول ولا عزاء للنساء ولا الرجال حتى

المجلة عنوانها المسلسل رقم 7 بسترجع بالعنوان ده زكرياتي "الأليمة" في دورة التربية العسكرية والمواضيع بتتكلم عن كل حاجة في حياتنا بنمر بيها مش عن التربية العسكرية بس والمجلة 6 موضوعات (3 مقالات و3 شعر) و2 فول جاي في السكة

وأليكم المواضيع عشان لوحد عايز يكتب تعليق لا قدر الله

فراغ الوقت

معركة البقاء

عبدو روتين "قصة حقيقية"

حدثينا

استعمار

القصيدة المغضوب عليها (الوطن الجريح)

المقطوعة الديوانية البديلة (عايش في الاوهام)

أنا في انتظار تعليقاتكم زي ما أتفقنا وشكرا على حسن القراءة والسلام عليكم ورحمة الله وبركاته

الوطن الجريح

انـظروا يــا عـرب للـوطن الجريح ... انـظـروا لــكـل هــذة الــدمــاء
انظروا لطـفل يـقـف بوجه الريـح ... انـظروا للـنـيـران فـي الأحشاء
كم من بلاد ضاعت وكم من بلاد ... راحت منا فيما بين اليوم والمساء
مـــاذا تـفـعلـوا أيـها عـرب ولـمـا ... كـــل هــذة الـفـرقـة الـصـمـاء
يــا وطــن العـروبـة يــا جـريـح ... كـم مـرت علـيـنـا مــن أمـسـاء
تــذكـرت فـيــهـا أيــام مــجــدك ... يــوم الـنـشــيـد ويـوم الـغــنـاء
أم يــوم حــطـيـــن تـــذكــرتــه ... حــيـن كـنـا نــقــطــع الأعــداء
كـانــت أعـز أيــامــك وأيـامــنـــا ... يوم كنت تنادي نـلبي النـداء
أما الـيـوم فـهـو ذا يـوم الـهـوان ... فـلــم يــعــد لــنــا إلا الـبـكـاء
فاعلـمـوا يـا أولــي الأمر مـنــا ... أنكم مسئولون أمام رب السماء
وكـــل يــوم وكـــل فـعـل يــراه ... الله وسيجزيكم به كل الجزاء
فإذا حان يـوم الـفـرقـة فـتـذكـروا ... الوطن الجريح الشاهد على كل داء
وإذا كانــت الـفـرقـة هـي الـداء ... فما لنا غير الوحدة هي الدواء
إنـــا يـــا قــدس لــقــادمــون ... شــاء الــعــدو أم لــم يـشـاء
فالله معناوهو محررك في أي وقت ... بأذنه انه قديـر على ما يـشـاء
فلن يرضى لنا الله كل هذا الهوان ... ولن يرضى لنا كل هذا الـعـنـاء
واليوم مستبشرا لمـا أراه خـيــرا ... كان وعـد وقـد اقـتـرب يـوم الـوفـاء

معركة البقاء

والله العنوان ده بيفكرني بفيلم أجنبي قديم شوية كان اسمه برضه " معركة البقاء " وسريعا كده قصة الفيلم كانت بتتكلم على مخلوقات غريبة جت احتلت كوكب الأرض لأنها كانت بتعرف تستخدم الطيران في الجو وفي الوقت ده كان الناس اللي على الأرض "هبل" ومش بيعرفوا يعملوا حاجة ... حتى الأمريكان نفسهم كانوا "هبل" برضه , (سبحاااااااااانه...) .
الخلاصة يعني إن البطل المغوار قدر انه يجمع الناس كلهم ويعلمهم الطيران ( ما تعرفش هو أتعلمه منين أصلا ...!!! ) وقدر انه يطرد المغتصبين الوحشين خارج نطاق الخدمة .... قصدي خارج الكرة الأرضية .
نرجع بقى للموضوع الأصلي اللي كنت عايز أتكلم فيه ...... ألا وهو " رغيف العيش " .. ذلك القمر الذي يتلألأ في سماء أحلام معظم أفراد المجتمع اللي زى حلاتنا (إلا من رحم الله) عندهم شغل كل يوم ومعندهمش وقت ولا أسلحة يدخلوا بيها معركة البقاء عند فرن العيش .
المهم يعني لأني مش عايز أتكلم في مشكلة الناس كلها عارفاها وزهقت منها بس كنت عايز أنقل كلام واحد صاحبي كان بيقول انه لما كان يحب يجيب عيش ... كان بيسهر لتاني يوم ويروح يبات جنب الكشك قبل الفرن ما يشتغل عشان يحظى بالمركز الخامس أو السادس في الطابور (ده لأن فيه ناس أصلا مقيمين أمام طابور العيش ) .
المهم برضه نبعد عن العيش بتاع الحكومة اللي بيشّبع ونروح للعيش بتاع الناس الهااااااي ... اللي هو بيتباع في الأفران الأفرنجي (فيما معناه بتاع القرص) هو معلش الرغيف ب10 قروش ... ماشي , وساعات ال8 بجنيه ... برضه ماشي ... إنما يا جماعة مايصحش أروح أشتري بجنيه عيش من ده وأخد كيس فاضي وأمشي ... أهو ده اللي مش ماشي خالص ..... أنا أفتكر زمان كان رغيف العيش ده كبير كده وبيتقسم اتنين ... ده كان زمان إنما دلوقتي الأمر يختلف تماما ... إيه اللي حصل ؟!!! على رأي عم سيد الخباز .. معلش يا باشا أصل الدقيق غلي ....... مش أنا قولتلكم محدش عارف الخير فين !!

كان معكم من أمام فرن "اللي ما يتسماش"
الزبون الدائم / " حمادة أوبجكت "

القاهرة

النهاردة الاربعاء 5/12/2007 لكن امبارح كان الثلاثاء 4/12/2007 (سبحان الملك ... محدش عارف الخير فين) لكن المشكلة الكبرى بقى ان أول امبارح كان الاتنين 3/12/2007 مش عارف ده عادي كده ولا ايه
المهم يوم الاتنين ده هو اللي هاتكلم عنه لأني كنت مضطر أسافر العاصمة "قاهرة المعز" عشان أخلص مشوار لأخويا في النقابة بتاعته (نقابة الصيادلة) وده لأن الأخوة بتوع النقابة هنا عايشين في الأوهام كلهم ومش عايزين يخلصولي حاجة ... وطبعا لاني ماروحتش قاهرة المعز دي غير كام مرة كده وممكن أبقى واقف في الشارع اللي انا عايزة وأقعد أدور عليه طول اليوم ... كلمت ناس من هناك عشان طبعا كما يقال "أهل مكة أدري بشعابها"
المهم انا انطلقت من مطار سوق الجملة الساعة 7.30 بعد طبعا ما أتعرفت على السواق البلطجي اللي هايسوق المكروباص اللي هيودينا قاهرة المعز و اللي من كتر ما أتخانق مع ركاب وسابوله العربية ومشيوا زعلانين فيه واحد جاب عربية بيجو وجه وقف ورا المكروباص ياخد الناس اللي نازلة من المكروباص متخانقين مع السواق البلطجي ... والمثير للضحك والسخرية ان البيجو اتحملت وكملت كلها من ركاب المكروباص وطلعت واحنا لسة واقفين زي ماحنا والموضوع بمنتهى البساطة ان السواق البلطجي أول ناس ركبت في العربية كان واحد ظابط جيش ومولع السيجارة ... فلما الواد التباع جه يتخانق ويقول ممنوع التدخين لقى انه بيتخانق مع ظابط طيران فاضطر طبعا انه يتخطى القانون المرة دي ... بعد شوية جم اتنين ركبوا وبعد ماركبوا قعدوا يسألوا الواد التباع هوا المكروباص ده رايح رمسيس ولا لا والواد التباع "منفضلهم" خالص لغاية أما الناس اتضايقت وأبتدت تزعق فراح نازل السواق البلطجي ومزعقلهم راحوا واخدين بعضهم وماشيين ...
شوية وجه راجل محترم جدا ركب ورا جنبي وبعد شوية جه أتنين كمان والواد التباع عايز يركب 4 ورا .... فطبعا الراجل المحترم أعترض بشدة على الموضوع ده وقاله احنا رايحين مصر ميت كيلو مش رايحين تفاهنا الحداية عشان تركب 4 ورا ومرة أخرى جه السواق البلطجي وأتخانق مبررا موقفه أن رخصة العربية مكتوب فيها انها بتشيل 4 ورا (ماتعرفش أزاي مكتوب في الرخصة الكلام ده) ومشي الراجل المحترم وجه بداله اتنين شباب زي الورد قعدوا وبقى فاضل واحد بس اللي هوا الرابع اللي ورا وفين وفين وجت واحدة ست مش كبيرة أوي عشان تركب وطبعا بعد السواق البلطجي ما اتخانق مع واحد من الشابين اللي زي الورد عشان موضوع الرابع ده أضطر الشاب البلطجي انه يوسع للمدام اللي داخلة وهو عمال يبرطم بكلام كده (على السواق البلطجي طبعا) مكانش باين منه غير ( دي خلق زي الزفت ) ... طبعا الكلام ده سمعته المدام فكرته عليها وقامت خناقة مايعلم بيها الا ربنا ..... ونزلت المدام .... وجه شاب تاني زي الورد وأخيرا بعد عناء وصراع طلعت العربية ... الحمد لله .... وأبتديت عند بنها كده أحس بالغربة وبأني عايز أرجع تاني لأمي وماليش دعوة والكلام ده وعالعموم يعني الحمد لله وصلت بالسلامة ولقيت هناك أحسن ناس والله مستنيين وعملوا معايا واجب جامد جدا جدا جدا ... انا ذات نفسي مش عارف هارده ليهم أزاااااي ... عالعموم انا حالتي أتغيرت جدا بعد السفرية دي وبعد ماكنت مكتئب جامد رجعت وانا مبسوط جدا جدا جدا
تحية لأعز أصدقائي اللي أستنوني في القاهرة وضيعوا كتير من وقتهم عشاني والى القاء في رحلات اخرى ان شاء الله

عايش في الأوهااااااااام

عجبي
عجبي عليك يازمن وعجبي عالعيشة والأيام
وعجبي عليا بعد ما بديت أعرف صورتك أوام
دلوقتي عرفت أني زمان ياما عشت في الأوهام
ماهو كل حاجة حلوة في زمننا خلصت مع الأحلام
معادش حاجة اسمها أحلام .. كله منين وبكام
* * *
عايش وبجري زي الوحوش ونفسي أكبر أوام
وصحيت أوام من نومي ده وعرفت انها أحلام
معرفش أيه رجعني تاني أعيد نفس الكلام
وخلاني من أول وجديد عايش في الأوهاااام

وأرجع تاني وأقول
فتحت عيني على زمان مكانش هو زماني
زمان مافيش فيه مكان لأصحاب الأماني
ولقيت حياتي في وسط ناس عاشت عشان نفسها
ونسيت حق بلدنا اللي أتربت في ضلها
وحسيت أني وحيد وسط الناس دي كلها
مهما صاحبت كتير حاسس أني وحداني
***
غنيت عشانك يا بلادي أحلى وأجمل أغاني
ودورت فيكي على ناس كتير كانت عيونهم واحشاني
ملقيتش فيكي غير بواقي ناس عايشة عالذكريات
وكل كلامهم اللي قالوه كن كلام عن اللي فات
عشان كده غمضت عيني ومش هفتحها تاني!!!

عايش في الأوهاااااااااااااااااااام

والله يا خواننا انا مانا عارف انا ايه اللي حاصلي .... فجأة كده لوحدي وبدون سابق انذار حسيت باحساس غريب جدا
احساس أول مرة أحس بيه في حياتي .... على رأي محمد سعد في نهاية فيلم اللي بالي بالك (أنا بقيت عامل زي صنية الكنافة اللي محشية طرشي)
حاجات كتير حصلتلي في حياتي
وقفات كتير وقفتها مع نفسي
خلتني أحس باحساس وحش أوي
خلت حالتي النفسية تعبانة مووووووووت
بس المشكلة ان لما الناس بتسألني مالك ؟؟؟
أنا مش بعرف أرد عليهم أقول ايه .... وده مش لأاني عايز أخبي والله .... المشكلة أني ذات نفسي مش عارف انا فيا أيه
ناس كتير بتحبني ويهمهم أمري أتكلموا معايا في الموضوع ده مرارا وتكرارا وأقنعوني بحاجات كتير عشان يهدوني من الحالة اللي أنا فيها .... بس في الاخر أديني برجع تاني لنفس الحالة اللي كنت عليها
المشكلة ياخواننا اني متخصص في الاكتئاب من زمان وكتيييييييير جاتلي حالات نفسية وحشة جدا
بس المرة دي غير .... "انها مختلفة كليتا هذة المرة"ا
مش عارف ايه الاحساس اللي جوايا
حاجة بتقولي اني مش عايش
حاجة بتقولي اني مش في المكان الصح
حاسس أني وحيد وماليش حد في الدنيا دي رغم ان الناس حواليا كتييييير
مش قادر أوصف الحالة اللي أنا فيها غير اني عايش
مجرد عايش .....
في الأوهاااااااااااااااااااااااااااااااااااااااام

حدثينا

حـدثـيـنـا يـا أمـنا حـدثـيـنـا .. عن شعبنا وعن فلسطينا

أذكري لنا الـتاريـخ وأصـلـه .. اذكـريـه ولا تخـفـي الأنينا

أذكــري لـنــا كــيــف كــنــا .. وكــيـــف كـــان مــاضــيــنــا

فـهــل يــا قـدسنا أنـتـي لــنــا .. وهل سيـأتي صـلاح الــديــن

أم أنـنــا نــحــلـم فــلـيــس لـنـا .. مـن هـذا الـتـمـنـي إلا الحـنـينا

حدثينا

حـدثـيـنـا يــا أمـنـا حـدثـيـنــا .. عـن شـعـبـنـا وعـن فـلـسطينا

حدثينا عن الـمـذابح والمقاتل .. والــدمـع الـذي فــي مـآقـيـنــا

هــل ســنـقـوم نــرد عـدونــا .. أم لــم يـبـق شـيـئـا بـأيديـنــا

سيحاسـبنـا الله يوم القـيـامة .. لـمـا نـحن فيه من تفرق مبينا

فـــمــاذا نــــقــــول يـــومــــئـــذ .. يـوم لا يـنـفع إلا من نصر الـديـن

حدثينا

حــدثـيـنـا يـا أمنــا حدثـيــنـا .. عـن شعبـنـا وعن فلسطيـنا

حدثـيـنـا عـن أطـفـال صـغــار .. يموتون بأيدي أولئك الملاعين

عن بيت هدم في لمح البصر .. كان قــد بـنــي فـي سـنـيـنــا

فــهــل نـــحــن فـــي ســكـــرة .. أم أنــنـــا صـــرنـــا نــائـــمــيــن

حدثينا

حــدثـيـنـا يــا أمــنـا حدثـيـنــا .. عن شعبنا وعن العراق السجينا

عـن بـــلاد غــصـبــت مــنـــا .. كانت مـن قبـل مقـابر الغـاصبين

أحــقـا يـــا أمـنــا مـا سـمـعــت .. هـل سـمـعتـي مـن قــال فـيـنـا

" لـم يـبــق شـيــئـا بــأيــديـنــا .. لـم يبـق إلا الـدمـع فـي مآقينا "

ليلتنا فل

أصدقائي الأعزاء مساء الخييييير... عايز أعرف ايه رأيكم في ميزة موجودة (أو بصيغة أصح "كانت موجودة")في الشعب المصري (وده مش كلامي أنا!) وتقريبا إحنا مش عارفينها أو يمكن مش واخدين بالنا منها...

كنت أتحدث من فترة مع رجل إنجليزي عبر الانترنت ومع أن الواحد مش بيفهم إنجليزي إلا طشاش كده فهمت منه قضي فترة صغيرة من عمره في مصر وسط أهلها ومع ذلك فهو يعتبر هذة الفترة من أفضل فترات عمره وعندما سألته عن السبب في ذلك قال: "كنت مضطرا لأن أذهب إلى مصر وأبقى بها فترة رغما عني وكنت في الأول حزينا جدا ولكنني عندما أخطلت مع أفراد الشعب العاديين جعلني هذا أشعر بالحزن الشديد وأنا عائد إلى انجلترا فقد جذبني لهم أنهم كانوا يعاملونني كأنني واحدا منهم ولكن هذا كان شيء طبيعي وقال لي الكثيرون في انجلترا أن هذا سوف يحدث ...ولكنني اكتشفت شيئا أخر لم أجده في أي مكان أخر سافرت أليه من قبل ألا وهو أن المصريون لديهم قدرة خارقة على جعلك تضحك .. حتى في أصعب المواقف وأخطرها فهم يتمتعون بروح فكاهية عالية جدا..." وأخذ يحكي لي على مواقف قضاها مع أشخاص مصريين وكيف كانت ممتعة ومضحكة رغم أن بعضها كان في منتهى الشدة والخطورة وفجأة...........

الكهربا قطعت عندي في البيت ومعرفتش ألاقي الراجل ده تاني ............ولكن........راحت فين الروح الفكاهية اللي كانت موجودة؟..! أنا بصراحة مش عارف.!!!!

أنا أعتقد أن معظم الناس كانت عندهم الروح دي ولكنهم اضطروا إلى أن يخفوها ظنا منهم أن إخفائها سوف يجعلهم يظهروا بمظهر أفضل بين الناس وأرى أن ما كتبته أبلغ رد على هذة الفكرة ....لأن خفة الدم دي ميزة تميزنا بها عن باقي شعوب العالم... وأخيرا أحب أقولكم:-

مساء الخييييييييييييييييير..............

استعمار

استعمار ... أنت عارف يعني إيه استعمار يعــنــي مــوت وتشــرد ودم ودمـــــار أنت مــش عـارف يـعـنـي إيه اسـتـعـمـار طــيـب تــعــرف يـعــنـي إيه انــكـسـار يـعـنـي ذل وهـوان وكـرامـة بـتـتـهـان يـعـنـي تـبـقـى عـايش كأنك مش إنسان خـايـف مـن واحد تانـي هو أصـلا جبان كــده أكـيـد أنت ٍعرفـت إيه الاسـتـعـمـار لأنه في الأول أو في الآخر برضه انكسار استعمار ... أنت عارف يعني إيه استعمار يعــنــي مــوت وتشــرد ودم ودمـــــار بـحـلـم في يـوم نكـون كلـنـا متـحـدين نكسر أي ذل ونكون إحنا اللي سايدين بحلم في يوم يرجعلنا زمن صلاح الدين ونعيش في زمن مافيهوش أي انكسار استعمار ... أنت عارف يعني إيه استعمار يعــنــي مــوت وتشــرد ودم ودمـــــار قــريــت زمــان فــي كــتــب الــتــاريــخ إن لــكـــل أمـــة لازم فــيــه انــحــدار بـس ده بـيـجي بعد عـلـو ورفـعة واقـتـدار وأنـا بــس كـنـت عايز اسأل مجرد سؤال إحـنـا لـيـه دايـمـا فـي تـخـلـف وانـحـدار يمكن هو انكسار ... ولا ده من الاستعمار استعمار ... أنت عارف يعني إيه استعمار يعــنــي مــوت وتشــرد ودم ودمـــــار يـاتـرى امـتـى هانرجع زي ما كـنـا زمـان كلنا بنخاف على بعض وكلنا شوق وحنان وأمشي في الشارع وأنا مش متهان وتبقى حياتنا بعيد عن التوهة والانحدار استعمار ... أنت عارف يعني إيه استعمار يعــنــي مــوت وتشــرد ودم ودمـــــار ليك يا صاحبي يالي ماتعرفش الاستعمار رغم انك عايش دايمـا فـي ذل وانـكـسـار

عبدو روتين ... قصة حقيقية

عاش عبدو روتين فترة كبيرة من عمره مخدوع في "مشاوير" الحكومة ومدافعا دائما عن المصالح الحكومية والعاملين فيها قائلا: يا خواننا هو مين اللي شغال في الحكومة ؟!! مش ناس زينا برضه . وكان له حجج وحواديت وروايات يثبت بها صحة وجهة نظره خصوصا مع صاحبه سعيد أبو حديد , وسعيد أبو حديد ده بقى صاحب عبدو عبارة عن شخص حلم حياته الأول والأخير انه يطلع بطاقة رقم قومي وللأسف يبدو أن الحلم المتواضع ده مش ناوي يتحقق ... الموضوع بمنتهى البساطة إن زمان أيام البطاقة "الكاوتش" (القديمة يعني) كان الموظفين بينقلوا الأسماء في سجلات بخط أيدهم قبل الكمبيوتر والكلام ده ولأسباب غير معروفة قد تكون نفسية أو عاطفية أو ظروف صعبة لدى الموظف المسئول عن الكلام ده بدال ما يكتب سعيد أبو حديد ... كتب سعد أبو حديد (دي حتى مش ماشية !) ... والمسكين سعيد مايعرفش القدر مخبيله إيه !!!

راح سعيد يطلع البطاقة الجديدة لقى نفسه متهم بالتزوير من سعد أبو حديد إلى سعيد أبو حديد يتكلم ويعمل مهما يعمل ... هوه برضه سعد أبو حديد !!! المهم واحد ابن حلال الله يكرمه دله على الخطوات "الروتينية" الطبيعية اللي لازم يعملها عشان يرجع تاني سعيد يعني ... "فيش وتشبيه" والتماس للمحافظ ويرفع قضية ومش عارف يعمل إيه في "الشهر العقاري" وشوية حاجات "بسيطة" كده وأهو بقاله 3 سنين مش عارف يخلص الإجراءات دي لدرجة انه بقى يمشي يكلم نفسه في الشوارع وفتح محل سماه "سعيد بيروقراطية لاستخراج البطايق المزورة" ... سبحان الجبار ... شوفتوا الياء عملت في الراجل إيه , عالعموم محدش عارف الخير فين !!!!!

المهم بقى في الموضوع إن عبدو كان فاكر إن العيب من عند سعيد مش من حد تاني لا سمح الله ... بس المشكلة إنها المرة دي جت في عبدو ذات نفسه اللي قعد ياولداه 4 شهور يخلص إجراءات رخصة العربية الجديدة بتاعته وفي الأخر قرر انه يفكك العربية ويبيعها من غير رخصة وياخد تاكسي أريح (على الأقل التاكسي مش ها يقوله عايز رخصة) .

ومن يومها وبقى أسمه "عبدو روتين"

كامن معكم من قلب الحدث :-

قهوجي القهوة اللي بيقعد عليها "سعيد بيروقراطية " و "عبدو روتين"

مستر /

"حمادة أوبجكت"

حدوتة بلدنا

نظر عمر (7 سنوات) من شرفة منزله المطلة على احد شوارع المدينة الفرنسية "مرسيليا" حيث كان يشاهد السيارات والناس في الطريق المقابل لمنزله ثم أنطلق مسرعا وكأنما تذكر شيء ودخل داخل الشقة ليجد عائلته المصرية المكونة من : الأب (35سنة) , الأم (30 سنة) , الجد "والد الأب" (75سنة) جالسة في الاستراحة وأتجه عمر مباشرة إلى جده قائلا: يلا بقى يا جدو ... احكيلي حكاية مصر بلدي اللي قولتلي أنك هاتحكيهالي في الويك اند .....

فكر الجد قليلا ثم قال: شوف يا عمر يابني ... اللي أنا هاحكيهالك دي قصة أحلى وأجمل بلد في العالم كله ... دي بلدك يا عمر ... دي بلدنا اللي اتربينا فيها ... وسيدنا محمد صلى الله عليه وسلم بيقول للصحابة عن مصر (إذا فتحتم مصرا فاتخذوا منها جندا كثيفا ... فإنهم خير أجناد الأرض ) ... وقال عليه الصلاة والسلام كمان عن شعبها (إنهم في رباط إلى يوم يبعثون ) ... وحكاية بلدنا دي ما تتحكيش في يوم ولا أسبوع ولا حتى شهر ده فيه كتب ومجلدات بتحكيلنا حكاية البلد دي والشعب ده .

بدأت حكاية بلدنا من أول ما أبندى التاريخ على أيد الفراعنة من أول "مينا" اللي وحد الوجه القبلي والوجه البحري وخلى مصر بلد واحدة وكمان "أحمس" اللي طرد الهكسوس اللي كانت مافيش قوة تقدر تقف قدامهم وبعد كده توالت العصور الفرعونية على بلدنا فجه ملوك كتير وسابوا أثار كتيرة زى "خوفو" و"خفرع" و"منقرع" و"سقارة" و"رمسيس التالت" و"توت عنخ آمون" و"الاسكندر الأكبر" اللي بنى الإسكندرية الجميلة...

وبعد ما أبتدت الحضارة الإسلامية وكانت مصر في يد الصليبيين فتحت مصر على أيد "عمرو بن العاص" في عهد سيدنا "عمر بن الخطاب" وكان فتح مصر بالنسبة للإسلام نقطة تحول لأن ده اللي ساعد على نشر الإسلام في باقي دول أفريقيا.

وعاشت مصر في عهد الدولة الأموية والعباسية وواجه شعبها الحروب الصليبية اللي جت بعد كده من أوروبا عشان تستولي على خيرات الشرق ووقف البطل العظيم "صلاح الدين الأيوبي" بجيشه اللي بناه أصلا من مصر وبني فيها قلعة صلاح الدين الأيوبي وطردهم وحرر بيت المقدس اللي في فلسطين اللي كانت اتفحت برضه في عهد سيدنا عمر بن الخطاب.

وبعد الصليبيين جه خطر أكبر بكتيير جدا هدد العالم الإسلامي ... ناس مافيش فرق بينهم وبين الوحوش والحيوانات المفترسة أتلغت من قلوبهم كلمة الرحمة ... الناس دول هما المغول ... دخل المغول بلاد المسلمين من ناحية الشرق واستولوا على كنوزها وأحرقوها وقتلوا شعوبها وحرقوا المكتبة الإسلامية اللي كانت في العراق فيها كتب كتيرة جدا عن الحضارة وكيفية بناء النهضة وخدوا الكتب دي عملوها جسر عشان يعدوا نهر الفرات لكن في النهاية وقف البطل "سيف الدين قطز" أشهر سلطان في دولة المماليك وحارب المغول وطردهم من بلاد المسلمين ....

وبعد كده جه "محمد على باشا" اللي أنهى دولة المماليك وأسس مصر الحديثة وأهتم محمد على بالعلم جدا وبعت بعثات لأوربا عشان الشباب المصري يتعلم ازاي يبني نهضة وبالفعل قدر "محمد على" يبني نهضة كبيرة جدا بس يا خسارة ولاده لما مسكوا الحكم بعده ضيعوها وماهتموش بيها وظلموا أهلها كتير عشان كده وقف البطل الفلاح "أحمد عرابي" قدام الخديوي وطالب بالحرية والعدل وبعد كده رجعت الحملات الصليبية تاني على مصر في صورة الحملة الفرنسية وبعدها الاحتلال الإنجليزي اللي أستمر أكتر من 70 سنة وقتها الشعب المصري قاوم وأصر على المقاومة وبذل أحلى المقاومات وأعنف الصراعات التي تدل على انه شعب عظيم فعلا وعرفت مصر خلال ال70 سنة دول أبطال كتير سطروا تاريخها زي "محمد فريد" و"سعد زغلول" و"مصطفى كامل" وأخرهم كان الرئيس الراحل "جمال عبد الناصر" اللي قام هو والضباط الأحرار بثورة 23 يوليو اللي طردت الإنجليز من مصر وبقى حكم مصر في أيد أبنائها وبني "جمال عبد الناصر" السد العالي لكن وقتها محدش رضي يقف جنبه ويمول السد عشان كده أمم "جمال عبد الناصر" قناة السويس عشان يبني منها السد العالي وفي نفس الوقت يخرج أخر جندي إنجليزي من على أرض مصر عشان كده جه العدوان الثلاثي اللي قامت بيه انجلترا وفرنسا وإسرائيل ضدنا لكن شعب مصر قدر يصد العدوان ده وقتها الرئيس "جمال عبد الناصر" خطب في الناس وقالهم أنا أولادي هنا في مصر ما سفرتهمش بره اللي هايمشي عليكم هايمشي عليا.

وعاش الشعب المصري فترة كبيرة مع زعيمه جمال عبد الناصر وكان بيساعد دول كتير على الاستقلال زي فلسطين والجزائر لكن في 67 حصلت النكسة وانهزمت مصر واحتلت إسرائيل سينا وبنت على حدودها خط بارليف عشان تمنع أي قوة أنها تفكر حتى تعدي وترجع سينا لكن الريس "جمال عبد الناصر" بداء على طول حرب الاستنزاف بعد ما جمع قوة مصر تاني ورفع معنويات الشعب ومات "جمال عبد الناصر" الله يرحمه وجه القائد الداهية "أنور السادات" وبداء يفكر ازاي هيحرر سينا وعرضت روسيا علينا المساعدة في الحرب ضد إسرائيل وبعتتلنا المهندسين اللي يقولولنا ازاي نعدي خط بارليف لكن المهندسين الروس أول ما شافوا خط بارليف كتبوا في تقاريرهم أنه مافيش حل نهائيا لخط بارليف غير القنبلة الذرية ورجع المهندسين الروس ونزل المهندسين المصريين أرض المعركة وقدروا بفكرة عظيمة جدا أنهم يهدوا خط بارليف عن طريق خراطيم المياه وبالفعل حاربت مصر وعبرت خط بارليف وأثبتت إن فعلا جندها هم خير أجناد الأرض وأستشهد في الحرب كتير من أبناء مصر...تقريبا مكانش فيه بيت في مصر إلا وفيه شهيد أو أكتر كل ده عشان نعيش رافعين راسنا وترجعلنا أرضنا وكرامتنا..........

فراغ الوقت

زي ما أتعودنا إننا نسمع مصطلح اسمه " وقت الفراغ " ولو إن معادش فيه حاجة من دي دلوقتي بعد ظهور النت والموبايل والحاجات الغريبة دي وبقى الواحد يروح مشوار واحد يلاقي النهار كله خلص ...!!!! نسأل الله أن يبارك لنا في أوقاتنا ...

عالعموم نرجع لموضوعنا . . . كنا بنتكلم عن " وقت الفراغ " اللي كنا بنحس بيه زمان وهو إن الواحد يعدي عليه وقت يلاقي نفسه مش لاقي حاجة يعملها ويحس أنه متضايق وزهقان وفي الحالة دي كنا بننصح الناس ببعض النصايح :- " خد معاك كتاب اقراه ... , خد المصحف بتاعك واقرالك جزء ولا جزئين ... , يا سيدي خد الموبايل بتاعك وألعبلك لعبتين ... !!! " ده كان "وقت الفراغ" ... إنما "فراغ الوقت" بقى هو إن سيادتك يكون عندك (5471) خمسة ألاف ربعمية واحد و سبعين مشوار فقط لا غير ومع ذلك تبقى مضطر إلى أن تقوم من النوم 7 صباحا ( على فكرة الكلام ده في الأجازة ) وتروح وتفضل قاعد لغاية 3 عصرا مش بتعمل أي حاجة خالص غير انك عمال تتفرج على اللي حواليك وتتحسر على الوقت اللي بيضيع منك ... حتى الحاجات اللي قلنا عليها من شوية بتاعت "وقت الفراغ" دي ممنوعة منعا باتا انك تعملها خالص ... انت عبيط ولا إيه ... عايز تشغل وقتك ... أهو ده اللي كان ناقص بقى ... هوه ده بقى يا صديقي اللي اسمه " فراغ الوقت"... شوفت ازاي بقى محدش عارف الخير فين !!!!!

طبعا أنت كل ده مش فاهم حاجة خالص من اللي أنا بقوله بس أنا ممكن أوضحلك بكلمتين وربنا يستر علينا وعليكوا بقى .....

" روح دورة التربية العسكرية وأنت تفهمني كويس جدا "

بلدي

بلدي يا حتة من القمر حتى لو الحال شانك

في عنيا أم الدنيا كلها و فقلبي الحسن زانك

مانتي اللي أنا على أرضك أتربيت في وسط ناسك

ومن قلب نيلك ارتويت وعرفت معنى كلامك
وفضلت عايش على أرضك وعرفت ريحة ترابك
وعاشرت ناسك الطيبين اللي عايشين عشانك
منى عمرهم يجي اليوم ويرفعوا راياتك
وشوفت التاريخ وأزاي قدرتي تفضلي واقفة مكانك
رغم الصعاب ورغم الحروب اللي قامت عشانك
كان في النهاية شعبك يقوم ويحفظلك كيانك
سموكي أم الدنيا لما شافوا مقامك
وقالوا عنك المحروسة لما سحرهم جمالك
مصر يا أم الدنيا سلام...الله يخلي حياتك
وتعيشي دايما حب وسلام وأشوفك مالية مكانك
تفتكري بعد الحب دا ممكن أجرب حرقة بعادك!!!

أحبكم في الله

اللهم إني أسألك حبك وحب من يحبك وحب عمل يقربني إلى حبك اللهم ما رزقتني مما أحب فاجعله قوة لي فيما تحب وما زويت (منعت) عني مما أحب فاجعله فراغا لي فيما تحب اللهم اجعل حبك أحب إلي من الماء البارد على الظمأ و من نفسي التي بين جنبي اللهم حببني إليك وإلى ملائكتك ورسلك وأنبيائك وعبادك الصالحين واجعلني ممن يحبك ويحب ملائكتك ورسلك وأنبياءك وعبادك الصالحين اللهم أحيي قلبي بحبك واجعلني لك كما تحب اللهم اجعلني أحبك بقلبي كله وأرضيك بجهدي كله